Қыркүйек – Қазақстан ішінде саяхаттауға қолайлы кезеңдердің бірі. Жазғы аптап басылып, туристік орындардағы қарбалас біртіндеп азаяды. Әсіресе күздің алғашқы айы тау туризмі, трекинг, экотуризм және тарихи-танымдық сапарлар үшін ыңғайлы. Алайда еліміздің аумағы үлкен болғандықтан, әр өңірдегі туристік маусымның ерекшелігі әртүрлі. Қыркүйекте қай бағыттарды таңдауға болады?
Көлсай, Қайыңды және Шарын: күзгі сапарды біріктіруге болады
Алматы өңірінде қыркүйек – табиғи нысандарды аралауға қолайлы уақыт. Жаздағы ыстық бәсеңдеген соң Шарын шатқалында жаяу жүру жеңілдейді. Ал Көлсай мен Қайыңдыда күзгі пейзаж басталады. Бұл бағыттардың артықшылығы – бірнеше туристік нысанды бір сапарға біріктіруге болады. Мәселен, Шарын – Саты – Көлсай – Қайыңды бағытын бірнеше күнге жоспарлауға мүмкіндік бар.
Көлсай мен Шарын еліміздегі ең көп турист баратын ұлттық парктердің қатарында.
Алтын-Емел: қыркүйекке қолайлы бағыттардың бірі
Жазда аптап ыстық болатын Алтын-Емелге сапарды күздің басына жоспарлау әлдеқайда ыңғайлы. Ұлттық паркке келушілер Әншіқұмды, Ақтау және Қатутау тауларын аралай алады.
Бұл бағыт автосаяхат, фототуризм және табиғи ландшафттарды тамашалауды қалайтын туристерге қолайлы. Дегенмен парк аумағы үлкен болғандықтан, маршрут пен көлікті алдын ала жоспарлаған жөн.
Бурабай: қысқа демалысқа ыңғайлы
Астана мен солтүстік өңір тұрғындары үшін қыркүйектегі ең қолжетімді бағыттардың бірі – Бурабай. Бұл уақытта курорт жағажай демалысынан серуендеу, хайкинг және сауықтыру демалысына ауыса бастайды.
Күзде Бурабай мен Үлкен Шабақты көлдерінің маңын аралап, Бөлектауға көтеріліп, Оқжетпес пен Жұмбақтасты көруге болады. Сондықтан бұл бағыт демалыс күндеріне арналған екі-үш күндік сапарға ыңғайлы. Бурабай еліміздегі ең танымал курорттық аймақтардың бірі болып қала береді.
Катонқарағай: Алтайдың күзін көретін уақыт
Күзгі табиғатты тамашалағысы келетіндер Шығыс Қазақстандағы Катонқарағайды қарастыра алады. Қыркүйекте Алтайдың орманы сары және қызыл түске боялып, өңірдің табиғи келбеті өзгереді. Катонқарағайда Берел қорғандары, Рахман қайнары, сарқырамалар мен таулы бағыттарды қамтитын бірнеше туристік маршрут бар. Мұнда экологиялық, емдік-сауықтыру, ауылдық және белсенді туризм бағыттары дамыған.
Алайда Алтайда күз ерте түсетінін ескерген жөн. Таулы аймақтарда күн күрт салқындап, ауа райы тез өзгеруі мүмкін. Сондықтан мұндай сапарды қыркүйектің алғашқы жартысына жоспарлаған дұрыс.
Түркістан: тарихи туризм үшін қолайлы мезгіл
Қыркүйекте тарихи-танымдық сапарды жоспарлағандар Түркістанды таңдай алады. Жаздағы аптап біртіндеп бәсеңдегендіктен, қаланың тарихи және мәдени орындарын аралау жайлырақ болады.
Қожа Ахмет Ясауи кесенесінен бөлек, сапарды Отырар, Арыстан баб және Сауран секілді тарихи нысандармен біріктіруге болады. Осылайша бірнеше күндік толыққанды мәдени-танымдық маршрут құруға мүмкіндік бар.
Қыркүйектегі сапарда нені ескерген жөн?
Күзде Қазақстан бойынша саяхаттағанда ауа райының айырмашылығын ескерген маңызды. Оңтүстік пен батыста күн әлі жылы болса, шығыс пен таулы аймақтарда түнгі температура айтарлықтай төмендеуі мүмкін. Тауға немесе ұлттық парктерге баратын туристер маршруттың ашық-жабық екенін, жол жағдайын және ауа райын алдын ала тексергені дұрыс. Жаяу бағытқа шыққанда ыңғайлы аяқкиім, жылы әрі су өткізбейтін киім алып, белгіленген туристік соқпақтан шықпаған жөн.
Жалпы қыркүйек жағажай демалысынан гөрі экотуризм, автотуризм, трекинг және мәдени-танымдық саяхаттарға қолайлы. Оның үстіне елімізде табиғи бағыттарға қызығушылық артып келеді: 2025 жылы Қазақстанның ұлттық парктеріне 3,7 миллион адам барған.
«Грэмми» айналасындағы дау: BTS байқауға қатысудан неге бас тартты
Жаңа пандемия кез келген уақытта басталуы мүмкін: ДДҰ не дейді?
«Бәрі қаржыға байланысты»: Неліктен «Қайрат» еурокубоктағы матчын Түркістанда өткізеді
Мадина Ералиеваға құрмет: Ерке Есмахан үш жылдық үзілістен соң сахнаға оралды
«Ботаникалық бақта пикник жасауға болмайды»: рейдтен кейінгі көрініс
