Қазақстан чемпионы «Қайрат» жаңа маусымдағы ең маңызды сынақтардың біріне дайындалып жатыр. Алматы клубы Чемпиондар лигасының бірінші іріктеу кезеңінде Черногорияның «Сутьеска» командасын қабылдайды. Қағаз жүзінде фаворит – қазақстандық клуб. Бірақ еурокубоктарда өткен жетістік те, трансферлік құн да жеңіске кепіл бола алмайды. Соған қарамастан қазіргі жағдайды саралайтын болсақ, «Қайраттың» келесі кезеңге өту мүмкіндігі жоғары көрінеді.
«Қайрат» неге фаворит саналады?
Бірінші себеп – командалардың қазіргі ойын ырғағы. Қазақстан премьер-лигасының маусымы қызған шақта. «Қайрат» ресми матчтарды тұрақты өткізіп, ойын қарқынын жоғалтқан жоқ. Соңғы турда алматылықтар чемпионаттағы үздік командалардың бірі саналатын «Оқжетпесті» 5:0 есебімен ойсырата жеңді.
Соңғы кездесулердегі нәтиже де көңіл қуантады. Мәселен команда қатарынан төрт рет жеңіске жетіп, бес матч бойы жеңіліссіз келеді. Биыл чемпионаттағы жалғыз жеңіліс – сырт алаңдағы «Ордабасына» қарсы ойын.
Ал «Сутьеска» мүлде басқа жағдайда. Черногория чемпионаты мамыр айының соңында аяқталды. Жаңа маусым әлі басталған жоқ. Демек команда бір айдан астам уақыт ресми матч өткізген жоқ.
Дайындық кезеңінде өткізген үш жолдастық кездесудің барлығында жеңіліс тапты. Бұл физикалық дайындық пен ойын ырғағына әсер етпеуі мүмкін емес.
Еурокубок тәжірибесі кімнің жағында?
«Сутьеска» өз елінің алты дүркін чемпионы болғанымен, Еуропа аренасында айтарлықтай жетістікке жете алған жоқ.
Клуб әлі күнге дейін Чемпиондар лигасы немесе Еуропа лигасының негізгі кезеңіне шықпаған. Қазақстандық жанкүйерлер бұл ұжымды жақсы біледі.
2018 жылы дәл осы бірінші іріктеу кезеңінде «Астана» қарағандылық емес, Черногория чемпионын екі матчтың қорытындысы бойынша 3:0 есебімен сенімді жеңген болатын. Бұл екі чемпионат арасындағы деңгей айырмашылығының айқын көрсеткіші ретінде жиі айтылады.
Құрам сапасы да «Қайраттың» пайдасына
Қазіргі футболда ойыншылардың нарықтық құны бәрін шешпейді. Дегенмен ол клубтың жалпы әлеуетін бағалауға мүмкіндік береді.
«Сутьесканың» барлық футболшыларының жалпы трансферлік бағасы шамамен 5,3 миллион еуро. Ал «Қайраттың» құрамы негізгі жұлдыздарын есептемегеннің өзінде бұдан қымбат.
Бұл айырмашылық командалардың кадрлық әлеуеті жағынан да алматылықтардың басымдығын көрсетеді.
«Қайраттың» жаңа қаруы
Биылғы маусымда алматылық клубтың шабуылы айтарлықтай күшейді. Әсіресе жаңа шабуылшы Марк Гуаль қысқа уақыт ішінде команда ойынына жақсы бейімделді.
Испаниялық футболшы алғашқы бес матчтың өзінде бірнеше нәтижелі әрекетімен көзге түсіп үлгерді. Оның тәжірибесі еурокубок деңгейіндегі матчтарда маңызды рөл атқаруы мүмкін.
«Сутьеска» несімен қауіпті?
Фаворит мәртебесіне қарамастан қарсыласты бағаламауға болмайды. Черногория чемпиондары қорғаныста тәртіпті ойнайды, стандарттық жағдайларды тиімді пайдаланады және қарсы шабуылда қауіпті.
Құрамында Қазақстан чемпионатында өнер көрсеткен тәжірибелі жартылай қорғаушы Йован Чадженовичтің болуы да белгілі бір деңгейде қосымша артықшылық бере алады. Ол Қазақстан футболының ерекшелігін жақсы біледі.
Іріктеу кезеңдерінде алғашқы кездесудің маңызы өте жоғары. «Қайрат» Алматыда сенімді есеппен жеңсе, сырт алаңдағы қарымта кездесуді әлдеқайда тыныш өткізе алады. Ал егер есеп айырмасы аз болса немесе тең нәтиже тіркелсе, Черногориядағы жауапты ойын әлдеқайда күрделі болмақ.
Бұл тек Чемпиондар лигасы үшін емес
Осы қарсыласудан өтудің стратегиялық маңызы зор. Егер «Қайрат» «Сутьесканы» жеңсе, Чемпиондар лигасындағы күресті жалғастырады. Сондай-ақ кем дегенде Конференция лигасы плей-офф кезеңіне дейін жету мүмкіндігін сақтайды.
Ал жеңіліс жағдайында команда бірден Конференция лигасының екінші іріктеу кезеңіне түсіп, Еуропа лигасына шығу мүмкіндігінен айырылады.
Барлық көрсеткіш бойынша «Қайрат» бұл жұптың фавориті саналады. Команданың ойын тәжірибесі, қазіргі спорттық бабы, құрам сапасы және өз алаңындағы қолдауы алматылықтарға айқын басымдық береді.
Дегенмен еурокубок матчтары көбіне ұсақ детальдармен шешілетінін тәжірибе талай мәрте дәлелдеген. Сондықтан «Қайрат» үшін басты міндет – Алматыдағы алғашқы ойында мүмкіндігінше сенімді есеппен жеңіп, Черногориядағы қарымта матч алдында өзіне қолайлы жағдай қалыптастыру.
Шикі сүт ішеді, етті жақсы көреді: Норвегия қаһарманына айналған Эрлинг Холанн кім?
Миллион жазылушы – дайын вице-президент? Қазақстан спортындағы жаңа тренд
Қазақстанда кино суретшісінің еңбегі әлі де толық бағаланбайды – Бекен Нарбай
Алакөлден Ыстамбұлға дейін: жазғы демалысқа қайда баруға болады?
Спорттағы қазақ тілі: сәннен сұранысқа дейін
